文：春麗〈香港第一代出位狗仔隊、多媒體製作公司主要平台主腦之一〉

大家有無試過，忽然好想好想聽一首詩歌同敬拜耶穌，但上youtube搵極都無，頂多都係得啲教會現場老翻錄音，搞到成個感動無晒……一年仲不下好幾次！慘！

我講得出，就當然是常常發生的親身經驗！最唔明白就係想聽個啲，都係教會唱左好多年，好好聽好有感動個幾首，點解youtube都會無！

身為製作人的我忽然職業病發作，本著「人做我唔做，無人做我做」的專業精神，我決定先禱告，後行事。如果蒙神悅納，我決定為左嗰啲基督教詩歌滄海遺珠，奉獻我們的第一次，自資製作詩歌集，仲要十隻詩歌都拍成MV，放晒係youtube任聽！仲唔哈利路亞！！

初步計劃，首先公開收集十大網上滄海遺珠詩歌，再分別邀請十個基督徒音樂單位從新演繹，編曲及錄音後，把十首歌都拍成MV，結集十首詩歌的CD，加送十隻MV和十個視像敬拜素材的DVD，當然還有精美相集歌詞集，可以的話仲要送埋琴譜結他譜，真係抵到離晒大譜！哈哈！咁就真係夠好玩，耶穌實鍾意！

仲未完！雙碟CD套裝印夠一萬幾千隻，網上優先訂購版的首五百人，仲可以憑碟換取1+1音樂佈道會門票，即是話您可以免費帶一個未信者睇concert，十個音樂單位現場敬拜，最後梗要有牧師呼召，個個決志信主我就最開心！哈利路亞！

您睇淨係諗都咁興奮精彩，做落去又點會唔好玩到爆，況且我們的軟弱有聖靈幫助，只要榮耀上帝，把人帶到神面前，我們的禱告必蒙主耶穌應允。

我們要禱告祈求三件事：第一，先求神的國和神的義在中間，第二求主給我們一個謙卑的心，榮耀歸主，第三，願參與的每一個單位都更加愛神，更加認識主，咁應該唔會錯得去邊。係哈利路亞，誠心所願！