父親節專訪〈三〉： 謙卑學習的爸爸－張繼聰
2009年6月21日 星期日
文：Gloria Wong
在爸爸張繼聰口中，張瞻（小占）是一個很「搞笑」的孩子。
「他很鍾意逗人開心。七八個月大嘅時候，你叫佢笑就笑，喊就喊，每個人見到佢咁做都會笑，佢覺得咁樣可以逗人開心；佢都幾慷慨，有零食他都會請人食。」
「都幾似我架！」
阿聰的信念是，如果沒有分享、沒有愛，人生不會感到滿足。
「有些人戶口真係冇乜錢，心靈卻好富足，等於一個人一個下午購買了一百萬東西都未必開心；我和朋友打一場藍球，只係幾蚊買一支水，我都已經覺得好開心。」
爸爸從小教他，做什麼工作不重要，最重要是找一樣自己喜歡的事情，他才會甘心命抵去捱苦、去做好。
「幾年前初出道，我可以寫一些流行元素嘅歌，例如寫K歌、寫愛情歌，但創作人係要堅持講自己睇到和認同嘅事，堅持咗幾年，我總認為我感覺到嘅嘢，一定有知音人。」
近年，有了家庭，有了孩子，阿聰經歷多了，掙扎也多了。
太太阿Kay早前不斷成為報導的焦點：阿Kay被狗仔隊偷拍走光照、上位後壓力大至患抑鬱症、婚姻亮起紅燈等等負面新聞。
阿聰在網誌這樣寫：「關於那些有趣報導，老實說，對於他們的採訪角度、用字或動機等等，我早已沒有放在心上了。不過偶爾心裡總有一些疑問，這些邏輯思想太反智了吧？」
有一次，我跟狗仔隊說：「而家新年，你應該同家人一齊吃飯，你唔需要為咗份工作匿喺草叢裡面，睇住我同家人食飯，咁對個社會有乜嘢意義，比你搵咁多錢咁又點，你有冇諗過你支筆會影嚮幾多人？」
他相信，生活是自己選擇的，縱使他不認同狗仔隊的做法，但仍會尊重，仍然以禮相待。
「我最唔能夠接受，喺大事上是非不分，我唔想見到有一日，做賊都係為咗搵食啫，咁就唔洗去坐監，社會咪冇咗對與錯，亦冇咗人與人之間嘅尊重。」
阿聰說，信仰對他很重要，令他放低很多他毋需擔憂的事情，但他仍會去學習愛身邊的人。
「當我發覺原來我嘅音樂係可以影嚮到人，我就希望用呢小小嘅影嚮力，盡量去宣揚一啲我認為係正能量嘅事。」
阿聰最近的派台歌《永和號》，記錄一間老字號雜貨店臨近結業的點滴情懷，歌詞寫有：臘肉蝦米、醬醋麵豉、鹹魚陳皮、梅菜黃糖……充分表現他那份對人文的關懷。
關懷身邊的人與事，分享愛、宣揚愛，阿聰說他仍要謙卑學習。
「天父鍾意人謙卑，我很認同失敗乃成功之母，成功亦都是失敗之母，當你成功之後你唔好好放低自己，覺得成功就代表永遠，咁就弊啦，你就會變得自大！」
阿聰的格言是，無時無刻將自己放在一個低的位置，不停增值學習，你會發現原來天外有天，自己其實很渺小。
學做爸爸亦是一生的路。
「孩子一生漫漫長路，爸爸就擔起領航員的角色。」
這些年來，阿聰每次出show，出場前都不是求天父給他一個good show，而是求天父守候他們，無論有什麼差池，幫助他們一起解決。
「我每日祈禱都係一樣，只求天父，當我遇到任何事，袮都陪住我行，人冇足夠智慧去明白天父嘅心意，我永遠相信天父會有最好嘅安排，我都會這樣教我個仔。」（三之三完）
