父親節專訪〈二〉：廿四孝爸爸－張繼聰
2009年6月20日 星期六
文：Gloria Wong
剛滿兩歲的張瞻〈洋名James〉，取名單一個「瞻」字，爸爸張繼聰說，寓意他有高瞻遠望的視野。
「人看得遠啲會快樂啲，又會少啲煩惱。我唔希望佢喺一班小朋友當中係最叻果個，而係最easy、最開心、最懂得care身邊嘅人，就係我最大嘅成就！」
做了爸爸兩年，阿聰說，一定要保持謙卑的心，一路生活，一路學習。
「我覺得和小朋友嘅相處，每一刻都很珍貴，由佢出世一刻，乜都唔知，好似條虫仔，到現在可以對話交流，我都好appreciate每一刻。」
兩年來照顧孩子有什麼難忘事？
最難忘是囝囝十個月大肚屙入醫院，日間要工作，夜晚要去醫院陪他，阿聰差不多兩星期沒有睡，體能上的確感到很辛苦。
「但我喺個仔身上學習咗好多，當我坐喺病房出面通宵等，我睇見除咗小朋友suffer，家長一樣咁痛苦，所以，未來我都有計畫，無論金錢上，抑或精神上，幫助多啲病童嘅家長。」
今個星期日父親節，他便和歌手周國賢攜手在數碼港，舉行慈善嘉年華會暨「好爸爸音樂會」，門劵收益將會撥捐匡智會，身體力行，幫助弱能人士及其家長。
身教重於言教。
「工餘時間我都喺屋企，陪佢玩遊戲、講故事，又會自己創作一啲故事，帶佢去公園，接觸大自然，最近帶佢去游水，quantity唔係最重要，最重要係quality。」
阿聰希望提供一個充滿愛和懂得尊重的環境給孩子成長，最近，阿聰家中便養了一缸魚，「我希望佢學識尊重生命，佢要負責照顧它、愛護它，so far他都幾enjoy。」
這個廿四孝爸爸滿腹大計說，待他長大些，家裡保存環保膠樽的重任可以交由他負責，慢慢讓他明白每一個人都需要負上某些責任。
俗語有云：「養兒一百歲，長憂九十九。」
今年初，阿聰便作了一首《爸爸聲》，由他和李克勤一起填詞和合唱，閒話對答輕鬆的歌詞，記錄了兩位初為人父又驚又喜的心情：「好怕成日無奶粉，好怕成日要打針，頭條又話有細菌，嚇到我手都震……開奶容易過掃風，扭抱阿仔你好重……紙尿片，每日去得好快，衫褲鞋，size要大……」
阿聰最喜歡副歌：「Because I'm loving you，簡單一句 Loving you，乜都可以畀晒你，只要你肯乖乖地……」道盡兩位「湊仔公」那份無言的愛。
「做父母最大嘅功課和挑戰，係長時間保持開明學習嘅態度，如果你發火，你都要懂得利用自己嘅脾氣：『嗱！你過咗呢條相處嘅底線，你令到我好唔開心，你要識得尊重人，唔可以再咁嘞！』」
兩年以來，阿聰累積了一大堆湊仔經……
「我看過很多書，唔好低估小朋友，尤其小朋友零至六歲，生長速度要比大人強，你可以同佢溝通，佢係絕對明白。」
「小朋友很喜歡掉東西，最簡單解決方法，我會抱佢離開，去屋企靜啲嘅角落，令佢覺得失去權利，佢就會學乖。」
「小朋友一齊經常會爭嘢玩，唔肯謙讓，當成家人同佢一齊玩玩具，你可以將果份喜悅，表現很跨張啲，等佢明白原來一齊玩係咁開心！」
「而家要預備個仔返學，父母首先要學習let go，預備佢點樣合群，返咗學之後又要睇佢情緒有冇變化，鍾唔鍾意返學……」
阿聰說著說著，對囝囝無微不至的愛，表露無遺。（三之二）
